امبارح الملك محمد صلاح سجل 3 أهداف وصنع الرابع مع طرابزون سبور ضد جالاتا سراي، ووصل إلى 7 أهداف في أول 6 مباريات له في الدوري التركي. أداء استثنائي وخطير ومش جديد على نجم مصري نجح في جذب أنظار العالم كله لمدينة طرابزون لمجرد أنه قرر اللعب بقميص فريقها.
لكن الحكاية يا ريس أكبر من هاتريك ومباراة كرة قدم. الأتراك من أول يوم فهموا إنهم ما تعاقدوش مع لاعب وبس، لكن عارفين كويس إن دا واحد من أشهر الشخصيات العربية في العالم وعلامة تجارية بيتابعها عشرات الملايين، لذلك تعاملوا مع محمد صلاح باعتباره فرصة لتسويق طرابزون وتركيا كلها كمان.
استقبال ضخم في المطار، عشرات الآلاف في الشوارع والمدرجات، وتصوير احترافي لكل خطوة، وبعدها بدأ صلاح يظهر وسط معالم المدينة وطبيعتها، ويجرب أكلها، ويتعرف على عادات أهلها وثقافتهم. كل صورة له بقت إعلان لطرابزون، وكل فيديو ملايين الناس بتشوف من خلاله البحر الأسود، وأوزنجول، والأكلات التركية، والزي الشعبي، وحياة الناس هناك.
الأذكى إنهم ما طلبوش من صلاح يقف قدام الكاميرا ويقول: تعالوا زوروا تركيا.. هم حطوه جوه الحكاية وخلو جمهوره يتعرف على البلد من خلاله، المواطن العربي اللي عمره ما فكر يزور طرابزون بقى يعرف اسمها ويشوف طبيعتها ويدور على أكلها وفنادقها، لمجرد إن صلاح اللي هو بيحبه موجود هناك.
طيب وإحنا يا ريس، عملنا إيه بمحمد صلاح طوال السنين اللي كان فيها أشهر لاعب عربي في العالم؟
كام حملة سياحية عالمية ظهر فيها صلاح وهو بيقدم الأقصر وأسوان والقاهرة والبحر الأحمر؟ كام فيلم قصير اتعمل بلغات مختلفة يخليه يحكي عن قريته وعن الأكل المصري وعن النيل وعن الأهرامات وعن الأماكن اللي شكلت طفولته؟ كام مرة استثمرنا مئات الملايين اللي بيتابعوه عشان يعرفوا إن البلد اللي خرج منها صلاح تستحق الزيارة؟
احنا عندنا واحد من أشهر وجوه العالم، لكن أقصى استغلال رسمي له غالبا بيكون صورة في مناسبة أو استقبال بروتوكولي باهت بعد بطولة، لكن تركيا في أسابيع حولت وجوده إلى ماكينة دعاية للنادي والمدينة والبلد كلها، وبدأت تكسب فعلا تجاريا وسياحيا قبل ما يخلص موسمه الأول.
بالمناسبة يا ريس محمد صلاح مجرد نموذج، عندنا علماء وأطباء وفنانين ورياضيين ومبدعين مصريين صنعت شهرتهم بلاد تانية، واستفادت منهم جامعات وأندية وشركات ومدن خارج مصر، هناك عارفين إن الإنسان الناجح قوة ناعمة وإن صورته ممكن تفتح باب للسياحة والاستثمار والثقة في البلد، أما عندنا فنحتفل بيه ع الضيق كدا بعد نجاحه وبعدين نسيب بلاد تانية تكسب هي من اسمه وقصته وتأثيره.
يا ريس والله العظيم مصر مش ناقصها آثار ولا شواطئ ولا تاريخ لكن محتاجة تعرف تحكي عن كل ده للعالم، ومحمد صلاح واحد من أقوى الأصوات اللي ممكن تعمل دا، الغريب عرف قيمة ابن بلدنا وقدمه كأنه سفير لمدينته وثقافته وأكله، طب مش احنا أولى بصلاح وأولى بكل مصري ناجح وأولى بأن شهرتهم تتحول لمكسب حقيقي وشباك شيك العالم كله يشوف مصر من خلالهم.. صح ولا إيه يا ريس؟
