بداية يا ريس، مين يختلف مع حضرتك على إن الوظيفة العامة لازم تكون من نصيب الأكفأ وإن الواسطة والمجاملة لازم ينتهوا؟ كلام حضرتك في حفل تخرج 1350 من أعضاء الجهات والهيئات القضائية عن معايير عادلة وعن بناء الإنسان كلام زي الفل ونتمناه جميعا، لكن اسمح لنا نسأل عن ناس اجتهدت ونجحت ولما وصلت إلى الأكاديمية العسكرية اللي حضرتك بتشيد بدورها اصطدمت بشروط تعجيزية تستحق المراجعة قبل ما نحتفل بنتائج التجربة.
حضرتك قلت إن لكل وزارة متطلباتها، وإن الهدف اختيار شباب مؤهلين لشغل وظائفهم. طيب إيه علاقة وزن معلمة بقدرتها على شرح درس؟ وإيه علاقة قدرة خريج حقوق على دفع أكثر من 100 ألف جنيه عشان يتعين في القضاء؟ دي أسئلة من صميم المعايير اللي حضرتك بتدافع عنها، ومن حق أصحابها يسمعوا إجابة.
تخيل يا ريس إن في حوالي 12 ألف مدرس استبعدوا من اختبارات الأكاديمية العسكرية، لأسباب منها الوزن الزائد والحمل وعدم اجتياز كشف الهيئة، يعني ناس ذاكرت ونجحت ورتبت حياتها على فرصة شغل، وبعدين لقت نفسها قدام شروط جديدة.
واحدة من المدرسات بتحكي إنها عملت اختبارات ضغط وبطن وجري، وبعدين عرفت إن تم استبعادها لأنها من أصحاب الوزن الزائد، تخيل حضرتك إحساس معلمة يتراجع تقدير علمها وتعبها قدام رقم على الميزان.
الصحة مهمة طبعا يا ريس مفيش كلام، لكن تقييم المعلم لازم يرتبط بقدرته الفعلية على التدريس. وكمان ما ينفعش نفصل صحة الناس عن ظروف معيشتهم، لما اللحمة والفراخ والسمك يبقوا فوق قدرة المصريين، طبيعي إن الناس تدور على الأكل اللي يشبع بأقل تكلفة، وتعتمد أكتر على العيش والرز والمكرونة، المسألة مش إن عندهم هواية أكل كشري لكن ضيق الحال بيخلي اختيارات الناس محدودة والله يا ريس، وده من العوامل اللي ممكن تساهم في زيادة الوزن فهل نعاقبهم على الميزان من غير ما نبص لظروفهم؟ طبعا لو فيه مشكلة صحية تتقيم طبيا أكيد، لكن كفاءة المدرس اختبارها الحقيقي جوه الفصل لما نشوف بيعلم أولادنا إزاي.
وفي القضاء، في كارثة تانية السنة اللي فاتت اتطلب من المعينين دفع 112 ألف جنيه للذكور مقابل التدريب ووقتها رئيس نادي القضاة قال إن المبالغ دي مقابل الإقامة والتدريب وأن الجهات القضائية حصلتها لصالح الأكاديمية. طب حتى لو كانت الرسوم لتغطية التكلفة فعلا ليه يتحملها شاب لسه بيبدأ حياته؟ ولو الدولة شايفة التدريب ضروري لشغل الوظيفة، طب مش الأولى تتحمل هي التكلفة؟ ابن الأسرة البسيطة اللي تعبت عشان تعلمه، هيجيب المبلغ ده منين؟
يا ريس، تقدير دور الأكاديمية ما يمنعش مراجعة قراراتها، نرجو من حضرتك توجه بنشر شروط التقييم وأسباب الاستبعاد ويفتحوا تظلم جاد للمعلمين المتضررين، ويراجعوا رسوم تدريب أعضاء الجهات القضائية وطبيعة تأهيلهم.
حضرتك قلت إن أثر الفكرة هيبان بعد سنوات، لكن اللي ضاعت منه فرصة شغل أو وقف مستقبله على مبلغ مش قادر يدفعه، أثرها وصل له بالفعل. اسمعوا الناس دي قبل ما تطلبوا منها الاقتناع بنجاح التجربة.
أضف تعليقك
