ما حدث في مجلس النواب خلال مناقشة كارثة قطاري العياط يستحق وقفة كبيرة، لأننا بصراحة مش عارفين بعض النواب كانوا موجودين عشان يحاسبوا وزير النقل ويسألوه عن أرواح المصريين، ولا عشان يعملوا له حفلة تكريم ويخرجوه من الجلسة بشهادة تقدير!

إحنا بنحترم مجلس النواب ودوره، لكن بنرفض إن الرقابة البرلمانية تتحول لمسابقة في مدح المسؤولين، خصوصا وإحنا بنتكلم عن كارثة فيها ضحايا ومصابين وأسر مصرية اتخربت بيوتها.
تخيلوا معانا المشهد اللي لسه معداش عليه كام يوم ودم الضحايا لسه مبردش بعد تصادم قطاري العياط وأهالي بيصرخوا على ولادهم، وناس بتسأل عن أسباب الحادث ومصير مليارات التطوير، وفي المقابل نائب يقف يقول: “عليا الطلاق بالتلاتة.. لو نطول كل الوزراء يبقوا كامل الوزير نخليهم كامل الوزير!”.
ده النائب فيصل الشيباني، اللي كمان شبه منتقدي الوزير بالناس اللي لو ملقيوش في الورد عيب هيقولوا أحمر الخدين!
يا سيادة النائب، هو السؤال عن سلامة القطارات بقى عيب في الورد؟! هو اللي بيطالب بمحاسبة المسؤولين بيكره الإنجازات؟!
النائب نادر الخبيري، ممثل دائرة العياط نفسها، خرج يقول: “والله والله والله.. كامل الوزير جه بعربية عادية ووصل لمكان الحادث في 22 دقيقة”.
كويس طبعا إن الوزير وصل بسرعة، بس هو ده السؤال اللي الناس مستنية إجابته؟! إحنا عايزين نعرف القطر خرج عن مساره ليه، مش الوزير وصل بعربية إيه وفي كام دقيقة!
طبعا الإشادات والنفاق استمر من نواب تانيين، منهم مثلا النائب علاء الحيدوي اللي قال إن الوزير بيشتغل وإحنا نايمين في بيوتنا، وإنه يستحق مزيدًا من الإشادة، والنائب ثروت سويلم شايف إن الناس اللي بتهاجم الوزير المفروض تشيد بيه، لأنه يستحق الإشادة!
ووصلنا للنائب السعيد عمارة، اللي قال للوزير: “متزعلش من الكلام على السوشيال.. الحادثة حصلت وهتحصل تاني.. عايزين 20 كامل الوزير في كل الوزارات”.
وهنا محتاجين نقف مع كلام سيادة النائب، يعني إيه الحادثة حصلت وهتحصل تاني؟! هو إحنا بنتكلم عن مطرة نزلت فجأة، ولا عن أرواح بشر ومسؤولية منظومة كاملة المفروض تمنع تكرار الكوارث؟!
طبعا محدش بيقول إن كل النواب كانوا بيطبلوا، ولا إن الإشادة بأي إنجاز ممنوعة. بالعكس، من حق النائب يشكر الوزير لو فيه إنجاز حقيقي، لكن من واجبه كمان يسأله عن أوجه القصور.

لأن الدستور المصري في المادة 101 بيقول إن مجلس النواب بيتولى سلطة التشريع، والرقابة على أعمال السلطة التنفيذية، يعني ببساطة، البرلمان مش معمول عشان الوزير يسمع فيه كلام حلو، ده معمول عشان المواطن يلاقي حد يسأل الوزير بالنيابة عنه!
فين الأسئلة عن أنظمة الإشارات؟ فين نتائج التحقيقات السابقة؟ فين تقارير الصيانة؟ وفين كشف حساب مليارات الجنيهات اللي اتصرفت على تطوير السكك الحديدية؟
وإذا كانت فيه إنجازات فعلًا، فالمفروض الوزير يقدم أرقامها ونتائجها، والنواب يناقشوها، مش يكتفوا بالتصفيق ليها.
الأخطر إننا لو تعاملنا مع كل كارثة باعتبارها مناسبة للدفاع عن الوزير، هنفقد أهم وسيلة لمنع الكارثة اللي بعدها، وهي المحاسبة.
إحنا مش بنطالب بإدانة كامل الوزير قبل انتهاء التحقيقات، لكن بنطالب بمساءلة سياسية وإدارية حقيقية، وبإعلان واضح عن أسباب الحادث، والمسؤوليات، ونتائج الإنفاق على السلامة.
يا حضرات النواب، الناس انتخبتكم عشان تسمع صوتها قدام الحكومة، مش عشان تنقلوا للحكومة صوت الإعجاب والتصفيق!
واللي عايز يشكر كامل الوزير يشكره براحته.. بس بعد ما يخلص شغله الأول، ويسأله: مين المسؤول عن أرواح المصريين اللي راحت؟!
لأن البرلمان اللي بيطبطب على المسؤول ويطبله وقت الكارثة، يبقى اتحول لفرقة حسب الله، مش مجلس بيحاسب ويراقب!
احترموا حزن الناس ووجع أهالي الضحايا.. ولو عايزين تطبطبوا على حد، طبطبوا على اللي فقدوا ولادهم مش على المسؤول اللي المفروض تحاسبوه!