بداية يا سيادة الرئيس، اسمح لنا نشكر حضرتك على المفاجأة اللي أعلنتها للشعب المصري، لما أكدت مرتين في أقل من 48 ساعة إنك هتسيب الحكم سنة 2030، وإن الموضوع محسوم ومفيش تعديل للدستور. وبكده حضرتك قطعت الطريق على كل المغرضين اللي كانوا بيقولوا إنك متمسك بالكرسي، وأثبت إن همك الأول والأخير هو مستقبل مصر، مش مجدك الشخصي.
لكن الحقيقة يا ريس إن فرحتنا ما كملتش لأن المبادرة العظيمة اللي أعلنتها لتجهيز رؤساء مصر القادمين ملخبطة شويتين، اللي بتقول إن الريس الجديد هيجي من خلال برنامج تدريبي مدته 30 شهر في الأكاديمية العسكرية، لأصحاب الدكتوراه اللي أعمارهم بين 40 و50 سنة.
مبدئيا هي والله فكرة تستحق الشكر والتقدير، لأننا كده مش هنسيب مستقبل البلد للصدفة، وهنجهز الرؤساء على نار هادية، بدل ما ييجوا لنا فجأة من صناديق الانتخابات وإحنا مش عارفين عنهم حاجة.. بس معلش يا ريس، عندنا كام سؤال ونرجو من حضرتك تريحنا وتقولنا الإجابة عليهم
أولًا ليه الدكتوراه تحديدا؟ حضرتك نفسك لما توليت رئاسة الجمهورية سنة 2014 كان عمرك 59 سنة، ومش معاك دكتوراه، ومع ذلك وصلت لأعلى منصب في الدولة، يعني لو حضرتك تقدمت للبرنامج النهارده، هتترفض في مرحلة مراجعة الأوراق! هل ده يصح أو يليق حد يشكك في كفاءة حضرتك كريس؟
وبعدين يا ريس، الدكتوراه دي شهادة تخصص علمي وبحثي، مش شهادة صلاحية لحكم الشعوب، يعني ممكن واحد يبقى عبقري في الهندسة أو الكيمياء، لكن مايعرفش يدير أزمة اقتصادية أو يتعامل مع البرلمان، والعكس صحيح؛ ممكن سياسي عنده خبرة عشرين سنة في الإدارة والعمل العام، لكن ماعندوش دكتوراه. نعمل فيه إيه ده؟ نبعته يحضر رسالة الأول؟
ثانيا، الأكاديمية العسكرية يا ريس. وإحنا طبعا نعتز بجيشنا العظيم ومؤسساته، لكن هو ليه الأكاديمية العسكرية بقت حاضرة في تأهيل كل التخصصات تقريبًا؟ القضاء والإدارة وأئمة المساجد والمدرسين والوظائف المدنية، ودلوقتي رؤساء الجمهورية كمان!
طب أومال عندنا جامعات وأحزاب ومؤسسات سياسية ليه؟ ومين أصلا اللي هيدرس للرؤساء المحتملين؟ مش خبراء وأساتذة فاهمين في إدارة الدولة؟ طب ما الناس دي نفسها ممكن تكون مؤهلة للرئاسة من غير ما تدخل الدورة!
ثالثا، وده السؤال الأهم، مين اللي هيختار المقبولين في البرنامج؟ وإيه الضمان إن الاختيار مش هيبقى قائم على رضا المسؤولين عن المرشح؟ أصل المفروض إن رئيس الجمهورية اللي جاي هو اللي هيشرف على المؤسسات التنفيذية، مش المؤسسات دي اللي تمنحه شهادة إنه يصلح يبقى رئيسها!
حضرتك في أزمة كمان كبيرة لو ربطنا الترشح بالدكتوراه أو اجتياز التدريب، وكدا هندخل في مشكلة دستورية كبيرة؛ لأن الدستور بيحدد شروط الترشح، ومفيهاش أي حاجة من دي، ولا حضرتك هتعدل الدستور.. بس هتعدله إزاي وانت قلت لا مساس بالدستور؟ شوفت الحيرة اللي احنا فيها ياريس؟
وفي النهاية إحنا بنشكر حضرتك على اهتمامك بمستقبل مصر، وبإنك عايز تسيب البلد وفيها ناس مؤهلة تشيل المسؤولية بعدك، بس اسمح لنا نقول لحضرتك إن مصر مش ناقصها أصحاب شهادات ودكتوراه، ولا ناقصها أكاديميات تدرب الناس على الحكم.. مصر محتاجة حياة سياسية تفرز قيادات حقيقية، وشعب يقدر يختار ويحاسب ويغير، ونعيش ونتداول السلطة بقى زي ما بيقولوا.
وأهو حضرتك خير دليل يا ريس.. وصلت لرئاسة الجمهورية من غير دكتوراه ولا دورة إعداد رؤساء وهتتنازل وتخلص مدتك وتمشي فبلاش نحط للرئيس اللي جاي شروط حضرتك نفسك ماكنتش محتاجها عشان تبقى رئيس.
وخلينا نتفق على حاجة أخيرة: اللي يختار رئيس مصر هو الشعب المصري.. مش لجنة قبول في الأكاديمية العسكرية، أصل كدا بدل ما نعمل انتخابات رئاسية هنعمل امتحان قبول ونعلق النتيجة على باب الأكاديمية والأول ع الدفعة يبقي الريس وخلاص.. يرضيك كدا والنبي؟
أضف تعليقك
