مازن مات وساب سؤال: مين يحمي ولادنا من الإهانة جوه المدارس؟!

مفيش أي مبرر يخلي طفل عنده 14 سنة يتعرض للإهانة أو التهديد أو التشهير جوه مدرسته، مهما كان الخطأ اللي ارتكبه! المدرسة المفروض تكون مكان يتعلم فيه الطفل ويحس بالأمان، مش مكان يخاف فيه على مستقبله وكرامته. وعشان كده، الاتهامات اللي كشفتها أسرة الطالب مازن عزيز زمزم لازم تتفتح فيها تحقيقات جدية، مش تتقفل بكلمتين تعزية وخلاص!

مازن طالب في تانية إعدادي، من قرية حنون التابعة لمركز زفتى بمحافظة الغربية، توفي بعد تعرضه لأزمة صحية مفاجئة، وساب وراه أسرة مكسورة، وأسئلة كتير عن اللي حصل له داخل المدرسة قبل وفاته.

أخته سما خرجت تحكي تفاصيل تقطع القلب، وتقول إن أخوها اتعرض للإهانة والتهديد بالفصل النهائي قدام زمايله، وإنه فضل يتحايل على المسؤولين ويقولهم: متفصلونيش، نقصوني في الدرجات، اعملوا أي حاجة إلا الفصل.

تخيلوا طفل عنده 14 سنة بيترجى المسؤولين عن تعليمه بالشكل ده!

وبحسب رواية أخته، مازن اتاخد لمكتب الأخصائي وهو بيعيط، واتقال له كلام مهين، وبعدها اتصور وهو ماسك إنذار الفصل كأنه مجرم في معتقل، والصورة اتنشرت على جروب المدرسة! طب هو إحنا بنربي عيالنا ولا بنكسرهم؟!

من إمتى تصوير طفل في لحظة ضعفه ونشر صورته قدام الناس بقى وسيلة تربوية؟! ومن امتى العقاب المدرسي هدفه إذلال الطالب بدل ما يصلح سلوكه؟!

الأخطر بقى إن أخته بتقول إن مازن اتعرض كمان للتهديد والشتيمة من ولي أمر أحد زملائه جوه المدرسة، بسبب شهادة حق كان المفروض يدلي بيها، وإن المدرسين ماحموهوش من الموقف ده!

لو الكلام ده ثبت، يبقى إحنا قدام إخفاق خطير في حماية طفل داخل مكان المفروض يكون مسؤول عن سلامته، ممكن يوصل لإنه جريمة قتل مش مجرد تقصير بس!

الموضوع أكبر من وفاة مازن، يعني لو مازن كان رجع بيته سليم، كنا هنعتبر اللي حصل له عادي ونستنى طفل يموت عشان نسأل عن كرامة الطلبة؟! أكيد لأ.

الأرقام بتقول إن خوف الأطفال من الإهانة والتنمر مش مشكلة بسيطة. دراسة علمية اتعملت في طنطا بمحافظة الغربية، واتنشرت سنة 2021، كشفت إن 22% من عينة ضمت 350 طالبًا في الابتدائي والإعدادي كانوا ضحايا للتنمر، و55% شهدوا وقائع تنمر.

الأخطر إن تقرير لليونيسف صدر سنة 2024، استنادا للمسح الصحي للأسرة المصرية سنة 2021، كشف إن 83% من الأطفال بين سنة و14 سنة تعرضوا لأساليب تأديب عنيفة، صحيح الرقم الأخير مش خاص بالمدارس وحدها، لكنه بيكشف قد إيه العنف في تربية الأطفال مشكلة تستحق المواجهة.

طب وإحنا عندنا كل الأرقام والدراسات دي، فين الإجراءات اللي تضمن إن أي طفل يدخل مدرسته وهو عارف إن كرامته مصونة، وإن محدش من حقه يهينه أو يهدده؟!

المطلوب دلوقتي من مديرية التربية والتعليم بالغربية مش مجرد بيان تعزية، لكن تحقيق شفاف يراجع كاميرات المدرسة، وصورة الإنذار المنشورة على الجروب، ويسمع شهادة زمايل مازن والمدرسين، ويحقق في واقعة دخول ولي الأمر واتهامات رفض استلام شكوى الأسرة.

ولو ثبت إن مسؤول أهان الطفل أو شهر بيه أو ساب حد يهدده، لازم يتحاسب وفق القانون، مهما كان منصبه.

والأهم إن وزارة التربية والتعليم تراجع أساليب العقاب والتعامل النفسي مع الطلبة. لأن فيه فرق بين الحزم والإهانة، وبين التربية وكسر النفس، وبين إنك تعاقب طفل على غلطته وإنك تخليه يحس إن مستقبله انتهى.

عايزين كمان الوزارة تعلن بشكل واضح عدد شكاوى العنف والإهانة داخل المدارس، ونتائج التحقيقات فيها، والإجراءات اللي اتاخدت ضد المخطئين. لأن تطوير التعليم مش بس فصول جديدة ومناهج يابانية وامتحانات، تطوير التعليم كمان إننا نحافظ على نفسية الطالب وكرامته.

مازن مش مجرد خبر وفاة، ولا رقم في كشف طلبة المدرسة. مازن طفل كان من حقه يتعلم ويتحاسب لو غلط، لكن من غير ما كرامته تتمس، ومن غير ما يحس إنه لوحده قدام الكبار.

ربنا يرحم مازن ويصبر أهله.. هو مات خلاص وراح دار الحق لكن ساب لنا سؤال مهم: ياترى كام طفل تاني ممكن يكون بيتعرض للإهانة جوه مدرسته ومش لاقي حد يسمعه؟!

أضف تعليقك
شارك