تخيل إن طفلين عندهم 7 و9 سنين، المفروض أول ما يخافوا من الدنيا يجروا على أبوهم عشان يحميهم.. لكن أبوهم نفسه يبقى هو مصدر الرعب، والشخص المتهم بإنهاء حياتهم!

دي مش حكاية من فيلم رعب، دي تفاصيل القضية اللي هزت مصر، والمتهم فيها محمد المنياوي، مدرب رياضي ومقدم برامج تلفزيونية، بعد وفاة طفليه في منطقة الطالبية بالجيزة.

بحسب التحريات المنشورة، الأب اتهم الطفلين بسرقة فلوسه، واعتدى عليهم بالضرب، لحد ما واحد منهم مات وراح دفنه في منطقة صحراوية، والتاني وصل المستشفى بإصابات خطيرة، والأب قال إنه اتصاب في حادثة عربية، قبل ما يموت هو كمان وتنكشف الشبهة الجنائية!

الأب اللي المفروض يكون أحن الناس على ولاده برر الجريمة البشعة اللي اتركبها بكلمتين: “كنت بأدبهم”!

هو من إمتى التأديب بقى معناه إنك تكسر عضم طفل، أو تهدد حياته، أو تتعامل معاه كأنه عدوك؟!

طبعًا القضاء هو اللي هيحسم المسؤولية الجنائية، لكن القضية دي لازم تفتح قدامنا ملف أكبر بكتير من جريمة واحدة: العنف اللي بقى عند ناس كتير جزءًا طبيعيًا من تربية الأطفال!

واللي فاكر إن حماية الأطفال من العنف والإهمال قضية هامشية، يبص على الأرقام الرسمية!

المجلس القومي للطفولة والأمومة أعلن إن منظومة نجدة الطفل استقبلت 27 ألف و700 بلاغ خلال سنة 2025، بزيادة 29.3% عن السنة اللي قبلها!

وفي أول 3 شهور بس من 2026، خط نجدة الطفل استقبل 6878 شكوى وبلاغ وطلب مساعدة، يعني حوالي 75 حالة كل يوم، من بينها شكاوى عنف بدني ونفسي وإهمال أسري!

صحيح مش كل البلاغات دي عن اعتداءات من الأهل، وزيادة البلاغات مش بالضرورة معناها زيادة العنف بنفس النسبة، لكن الأرقام بتكشف حجم القضايا اللي بتوصل لجهات حماية الأطفال.

طب كام طفل بيتعرض للعنف ومحدش بيبلغ عنه أصلًا؟! وكام أسرة بتعتبر الضرب والإهانة حق طبيعي للأب والأم، لحد ما تحصل كارثة؟!

المصيبة إننا لسه بنسمع عبارات زي العيل محتاج يتربى، وإحنا اتضربنا وطلعنا كويسين، والضرب بيعلم الأدب!

لأ يا جماعة، الضرب مش تربية، والإهانة مش تقويم، والخوف مش احترام!

وفيه سؤال تاني مهم جدًا في القضية دي: إزاي شخص متهم بالجريمة البشعة دي كان بيظهر على شاشة تلفزيون وبيخاطب الناس؟!

مش المفروض إن المؤسسات الإعلامية يكون عندها معايير مهنية وأخلاقية لاختيار اللي بيطلعوا للجمهور؟ وهل مجرد إن شخص عنده فلوس أو علاقات أو قدرة على تقديم برنامج يخليه مؤهل يمسك ميكروفون ويتكلم باسم المجتمع؟!

الجريمة البشعة دي بتفتح سؤال مشروع عن معايير اختيار مقدمي البرامج، ومتابعة أدائهم، ومدى التزام المؤسسات الإعلامية بالمسؤولية المهنية.

طبعًا مش من حقنا نشخص المتهم نفسيا، ولا نقول إن كل شخص عنيف مريض نفسي. فيه فرق بين المرض النفسي والسلوك الإجرامي، والمسؤولية الجنائية بيحسمها القضاء.

لكن من حقنا نسأل: ليه لسه بنستهين بالعنف داخل البيوت؟ وليه بنستنى الكارثة عشان نتحرك؟!

المطلوب مش بس محاسبة المتهم في القضية دي، لكن كمان تفعيل آليات حماية الأطفال، والتعامل الجدي مع بلاغات الإساءة، وتوعية الأسر إن التربية مش رخصة للضرب والإذلال.

من أيام قليلة، كنا بنتكلم عن الطفل مازن زمزم اللي مات بعد ما اتعرض للإهانة والتهديد جوه مدرسته، والنهارده بنتكلم عن طفلين ماتوا، وأبوهم قتلهم تحت مسمى التأديب! من المدرسة للبيت، السؤال واحد: إمتى هنفهم إن الطفل مش ملكية خاصة لحد، وإن حماية الأطفال مسؤولية مجتمع كامل؟!

يا حضرات المسؤولين، حماية الطفل مش مجرد شعارات في المؤتمرات، ولا حملات توعية على السوشيال ميديا. حماية الطفل بتبدأ لما نعتبر ضربه وإهانته خطر يستحق التدخل مش شأن عائلي محدش يتدخل فيه!